英國電話卡點揀好啊大佬

有咩電訊商同通常點玩法?

EE,O2, 3 & Vodafone都係英國主要嘅電訊商,而佢地旗下有好多唔同嘅品牌。

1. Pay as you go
唔駛焗住上台,非常彈性,即叫即蒸,無錢即cut。
而且通常好多選擇,有數據package亦有分鐘package,不過而家都唔多人煲電話粥啦:( 連電話粥呢個term都唔知乜春啦而家d後生

2. Pay monthly sim (12 months contract)
好似平時香港啲月費上台plan咁,間唔時有啲上台優惠。適合過嚟長期生活又知道自己長期需要一定流量/分鐘嘅人。

點樣買最好?機場有無?

除左門市之外,超市都可以買到各大電訊商嘅電話卡。一般電訊商都可以上網直接order張sim卡去你屋企。

Heathrow T2,T3同T5都有SIM Local 嘅實體店同Vending Machine賣各大電訊商嘅sim 卡。如果想知其他機場可以入呢個網睇:https://www.simlocal.com/store-locations/ 作為一個普通90後,以我理解嘅大眾需要,建議你哋落機求其買張sim card用住先頂住到埗頭幾日,再揀第日心水長遠想用嘅電訊商,上佢個網top up或者揀鐘意嘅plan。因為機場offer果d通常都比較貴。

Sim Local Shop locations


我哋推介邊間?

相信如果一般旅行黎英國嘅朋友會聽人推介用Giffgaff多,原因係夠平同夠方便,你可以online order sim card直照送去你屋企或者搵朋友一早order定俾你,等你一落機就有得用。但如果香港人嚟英國生活長遠用,我個人唔推介Giffgaff,好多人嘅feedback話Giffgaff 係倫敦嘅signal唔穩定,其實佢都只不過係一種虛擬電訊商,用緊O2嘅network去提供connection,所以想慳錢同機不離手嘅朋友仔就要認真諗清楚啦!

如果你有打算長時間留係英國,個人就建議用返最大電訊商EE或者O2,因為係倫敦區收得最好同最穩定,即使去到一啲偏辟啲小鎮都收到無問題。

另外EE嘅Pay as you go用剩左嘅data 可以roll over 到下個月,同埋可以隨時send個message就轉到plan,岩哂成日改變主意或者budget嘅香港人! (疫情期間唔駛返工我都轉左5磅嘅plan LOL)

歐洲跨國使用

有一樣好緊要嘅野係脫歐前用英國嘅sim card係可以係歐洲通用。換言之,去歐洲旅遊嘅你係唔需要買過張sim card而用番英國嘅plan,真係仲方便過去日本呀!

但隨住英國未來會全面脫歐,呢個scheme唔知會唔會保留呢? 大家就要繼續留意我哋嘅page~一有消息我地會立即同大家分享!

Giffgaff Pay as you go月費計劃
EE Pay as you go 月費計劃
O2 Pay as you go 月費計劃

大家可以就住個人需要去join唔同嘅Plan啦!  主要就住大家每月所需嘅數據用量去決定。

倫敦其實已經有5G網絡,但感覺覆蓋率唔係好高,除非你係潮流嘅頂端,如果唔係我建議大家等多一排等到個技術再成熟少少先轉plan。

如果想搵個人問清楚,好歡迎你msg我哋~我哋會盡量答

------------------

Lion Rock Hill UK 香港人來英落腳點

兩個90後香港人於英國lockdown期間開嘅平台,無中武肺。

希望盡小小力幫香港人,保留香港文化同精神。

加入FB Group – 英倫尋找屬於香港人嘅另一種生活 同聲同氣群組及推廣香港文化活動

https://bit.ly/2MIggVk

🍜Follow IG 每日update 英倫生活文化 資訊

https://www.instagram.com/lionrockhill.uk/

英倫搵屋攻略

相信大家嚟之前最concern嘅野就係住邊同埋搵唔搵到工,所以就想先整合咗英倫搵住宿最重要嘅資訊先!好多人話英國生活指數好高,樓價同香港一樣咁貴。我個人覺得喺英國較多選擇~同埋肯搬出少少會搵到唔少surprise。始終英國地多,就算同香港一樣水平嘅租金,相對空間感大好多,密度亦低。

  1. 認識倫敦地區

倫敦由三十三個行政區(Borough)組成,而Transport for London(TFL)將倫敦分為九個大Zone。同香港一樣愈中心嘅地區就愈多經濟活動,租金同樓價都因為咁而比較高,不但生活所需咩都有,而且喺倫敦市中心內返工都好方便。

但咁樣又唔完全代表住係核心嘅外圍享受唔到英倫生活。The Elizabeth line 嚟緊將於2020年落成,呢條係一條打通左由東倫敦去西倫敦嘅快線,加上倫敦歷史悠久嘅Tube System,基本上只要有Tube或Overground嘅地方都勁方便。對於日日都要搭交通公具嘅香港人黎講搭一頭半個鐘Tube濕濕碎啦!住出啲租金平啲,又多啲機會接觸大自然,做一個真正嘅英國人。

以下交通時間比大家參考,我哋嚟緊會有另一篇英倫交通嘅詳細介紹。:
-由市中心Zone1嘅Oxford Circus到西邊嘅Paddington(搭Bakerloo Line需時15分鐘)
-由東邊Zone1嘅London Bridge到西邊Zone1嘅Notting Hill站(搭Jubilee及Hammersmith Line需時35分鐘)
-由Zone3東邊嘅Straford到Zone1 市中心Piccadilly Circus站 (搭Jubilee及Bakerloo Line需時45分鐘)
-由Zone6西邊嘅West Drayton到北邊Zone1嘅Kingscross站(搭GWR train及Hammersmith Line需時50分鐘)
所以其實真係好睇你住果個位置有咩line,住Zone5-6都唔代表要穿州過省先到市中心嘅(唔好再歧視住得遠嘅屯門友/zone6仔女)。


(資料來源 London TFL)

  1. 倫敦房租價格
    如果你十分有錢想了解點樣係英國置業,呢個page未必啱你。講下笑啫,若果好多人有呢方面嘅需求我哋可以遲啲同大家分享。不過現階段想向大家分享下一落機後點樣搵地方落腳,個人建議剛到埗時,能夠投靠當哋熟人係最好不過, 但係無嘅話都可以選擇Airbnb短租,之後好好利用頭幾日去適應時差,再慢慢搵合適嘅住宿。

    以下有幾樣因素大家要考慮:返工時間(學校或工作地點,主要金融區為Canary Wharf, Farringdon, Barbican,Bank,Liverpool Street 一帶)
    1. 去市中心嘅時間?幾耐要去一次市中心?
    2. 居住環境(周邊有冇公園Post office NHS/有冇前園後園/社區minority etc.)
    3. 想住咩類型既屋?(Terrace /Semi-detached/Detached/Cottage/Flat)
    4. Housemate人數?
    5. 要唔要包傢俬?
    6. 間房要幾大?日光夠唔夠?
    7. 駛唔駛個人洗手間?
    8. 駛唔駛獨立廚房?
    9. 需唔需要私人車位?
    10. 每月預算?跟據https://www.london.gov.uk/嘅2019資料,以2 Bedrooms單位大家可以參考租金如下:

以上因素都影響左你嘅實際租金, 當然同人Share Flat租金一定會比較平,但係室友嘅質素就睇你好唔好彩啦。

  1. 邊度搵屋?
    以下分享幾個英國常用找單位或者屋嘅網站同渠道 (絕無廣告成份…有就好了LOL)

Facebook Marketplace係近幾年先興起嘅渠道,當中會有Agency同Private Landlord, 而Facebook 入面有一啲group會分享spare room資訊大家可以留意下,例如:

”英國打工渡假簽證UK Working Holiday 搵工,搵住宿群組”、

“英國生活資訊:長租/短租/轉租/跳蚤市場”

”英國打工渡假情報站-租屋及二手買賣版”

”台灣人在英國 Taiwanese in UK”和”[新版] HK Working Holiday Makers @ UK   (英國工作假期)

呢一類嘅單位一向都係target港台黎嘅working holiday人仕,所以溝通一定不成問題,同埋租約比較flexible,是短租首選! 當然詳細要同返landlord傾啦!建議大家搵嘅時侯可以運用Google map行下London感受下小區嘅feel,如果上網睇都覺得怪怪地就咪哂時間去睇樓啦。

另外如果想搵英國agency嘅話可以留意以下網站:
以下網站可因應地區,價錢,房間數量同單位嘅類型去分類,你可以按自己需要去搵適合自己嘅單位。

Rightmove – https://www.rightmove.co.uk/

Zoopla – https://www.zoopla.co.uk/

On the Market – https://www.onthemarket.com/

Primelocation – https://www.primelocation.com/

注意佢哋都會跟足規矩, 大部分都要至少6個月contract,如果無收入証明就要一口氣交哂6個月租加埋 1.5個月deposit之後又一堆雜費, 總括黎講就係要拎一舊錢出黎。

但當然agency有海量單位係手,又有agent跟你份租約,遇到差屋主嘅機會相對低。

英倫房屋類型 (我就鐘意cottage喇,你呢?)
  1. 開始搵屋
    1. 英國出租房屋類型
      1. House
        一排一排嘅英式小屋相信係唔少人嘅憧憬,而英國人對園藝嘅追求係全球數一數二,相信黎到嘅你哋都會羨慕英國人細心打理嘅屋。如果你係同另一半黎/同屋企人黎/同fd夾租,可以afford到一間屋嘅話當然最好啦!英國有好多選擇,搬出少少你可能已經搵到£3000有4房3廁又有大花園/私人車位嘅屋,係香港點搵呀?
      2. Flat/ Apartment
        如果afford唔到租屋,倫敦都有好多質素好高嘅單位。我以前住位於東倫敦嘅Greenwich(格林威治區)近年發展得好快,都起左好多兩三層高嘅Apartment property,有河景又有管理公司打理。
      3. Shared Flat/ House
        同人合租係比較適合working holiday/學生 /單身嘅選擇,如果岩岩過黎未想commit太高租金又唔介意同人share可以考慮下。通常廚房廁所要share,要輪流打掃。有好有壞,好彩嘅話搵到性格夾嘅flatmate可以好似住大學宿舍咁開心,黑仔嘅話遇到烏糟又嘈生活作息唔夾嘅flatmate都幾難搞。如果需要更多privacy可集中搵有獨立廁所嘅套房(Ensuite)。而住Shared House就有可能enjoy埋前園同後園。
      4. Studio
        比套房大少少,又未稱得上Flat嘅單位。有廚房,浴室,活動空間。

  2. 租金包咩?
    搵屋嘅時侯要注意租金係All,Partial定係No bills included。Bills係講緊水、電、Gas、網絡同埋Council Tax (英國嘅地區council會每月向房子擁有人收取費用,用黎向當地社區提供服務,例如收垃圾,派垃圾袋,街燈等等)。如果搵到All bills included就當然最好,冬天用幾多暖氣都唔怕(當然唔可以日日無限沖涼放題)。我有朋友嘅房東好慳家唔比佢哋開太耐暖氣,搞到我個friend凍病左,所以入住前每一樣野都要好小心咁留意。
    1. 訂金(Deposit):確認入住前要比五至六個禮拜嘅租金,如果你退租嘅一刻因為你而有乜家電破損,僱主有權係你嘅訂金入面扣除。呢度留意下,都唔少案例僱主會而各大小理由去拖錢或者扣錢。係英國其實有法律規定要房東收到Deposit 30日內要將訂金放落Tenancy Deposit Protection Scheme入面,由英國政府做擔保。房東同租客有咩糾紛嘅話就會經第三方押方保管機構解決,以防筆錢「被消失」。
    2. 留房費(Holding Fee):當你想房東幫你保留房間嘅時侯,就會需要比留房費。而呢筆錢通常可以用返黎交租。有人曾經分享過,有屋主會呃人話自己唔係英國,提供左屋嘅相話唔方便帶你睇樓,見你幾鐘意間屋就呃你過住留房費先,所以各位見唔對路就唔好亂信人喇。

  3. 預約睇房 &注意事項(暗示搵人幫手一齊揸車去唔同地方睇屋)
    一定!一定!一定要親身去睇房!親身睇過中伏機會大減,以防入住果刻先發現不必要嘅surprise。就算你係google map行過果條街幾多次,有好多野要現場先感受同觀察到。比你係房東都會放大間屋嘅好處,將缺點縮細。如果你本身係香港都已經會做足功課搵定屋又知幾時到英國,可以預先約定到步果個禮拜房東睇屋再落決定都唔遲。搵樓咁重要,唔好急,最緊要快。LOL

    如果你係想經agent搵房嘅話,有某啲公司會揸車帶你一次過睇幾間。如果你係直接搵房東租屋嘅話就要自己事先安排好交通。

    睇房果陣記得要留意以下幾點:
    1. 附近環境:唔好淨係睇你租果間屋/房,留意下果一個社區係咪適合自己。比如所選嘅地方附近有冇銀行/大supermarket/中超/餐廳/Post Office等等基本商店?或者有冇足夠文娛設施?(倫敦大大小小公園都有三千幾個,有撻草地好閒)成個社區氛圍係點?住緊咩年齡層/人種多?安唔安全?
    2. 交通:駛唔駛行好耐先搵到tube/train/overground/bus station?有幾多條line可以搭?如果OT或夜歸嘅話有冇方法唔坐勁貴的士返黎?(啋過你呀!我黎英國就係唔想再OT!)夜晚行路危唔危險?
    3. Housemates/Landlord:「你的housemate如何,你的日子也必如何。」如果睇房果日佢哋係度就更加好!傾下計攞多啲資訊去了解佢嘅作息習慣/性格/係咪成日開p。另外留意你landlord係會live in定live out,我哋相信大部分人都唔會想同你包租公一齊住,沖涼沖耐啲都驚比人小。
    4. 日光:提提大家英國夏天嘅日照時間長得驚人,最癲果陣4點幾天光10點個天先黑哂,如果你係night shift nurse間房又冇窗薕就恭喜你喇。
    5. 暖氣/風扇:英國冬天可以好凍所以係必定有暖氣的,想穩陣啲你可以叫landlord試開。而夏天都可以好很熱,一般都唔會有冷氣,如果landlord有提供風扇係bonus。
    6. 廚房:我哋好鐘意煮野食,所以廚房係用明火定電磁爐係好影響我哋租唔租一間屋!各位master chef都要留意下你套架餐岩唔岩你心水,有冇洗碗機/幾多個爐頭/焗爐等等。

  4. 簽約前要注意嘅細節
    1. 租約期:通常放租果陣已經有大約列明,一般係半年、一年同兩年。呢邊冇香港果種生約死約嘅文化。如果想提早完約合約上都有break clause列明。
    2. Terms:睇清楚重要資料有冇串錯寫錯,電器傢俬壞左邊個負責,水電煤邊個比,完約要點處理同埋幾耐,准唔准許再出租等等。有興趣詳閱可以去政府網睇清楚https://www.gov.uk/private-renting-tenancy-agreements/what-should-be-in-a-tenancy-agreement

  5. 入住新屋
    恭喜你搵到心儀嘅地方!你係英倫嘅生活又踏進左一大步。記得一去到就check下所有野有冇損壞,有就盡早同landlord提出。如果你租果間屋係Partial/ No bills included我哋會有另一個教學簡介同說明點樣交各種費用。


    多謝大家睇哂咁長嘅住宿攻略,我哋會keep住upload更多唔同住宿有關嘅教學及建議,同埋寫下某啲社區介紹/發展/casestudy等等,方便大家日後係英倫嘅生活。

    資料及圖片來源https://www.movesmartly.com/articles/2017/06/detached-home-for-sale-is-actually-linked-to-property-next-door
英國Terrace Houses
英國Semi-attached Houses
英國Apartment

搵工前要申請嘅National Insurance(NI)簡介及申請流程

一)乜野係National Insurance?
話說人生有兩樣不能避免嘅事-死亡同交稅。但sorry,係英國打工嘅你係要比更多嘅雜費-除左交稅之外你仲要交NI。乜野黎?好多人將NI同一般薪俸稅混淆,National Insurance其實係一種保障國家及社會保險系統,有交NI嘅人就可以有資格享用國家嘅福利,例如產假、退休金、養老金等等。所以打算要黎英國打工或者自僱嘅你,一落地就要申請NI number喇。搵工嘅階段係需要提供NI number比僱主,雖然部分公司可以接受後補NI number,但方便起見,建議大家一落地就要申請。一黎英國果陣都覺得好無奈,點解要交咁多錢?辛苦做野做左一個月扣左呢樣果樣之後,真正落袋舊錢好似同fresh grad出黎個人工一樣lol 但而家諗返就明白其實都係為自己好嘅一種保障制度,所以大家快啲搞掂佢啦!

二)咩人要申請National Insurance ?
如果你係符合以下條件就要申請:

A)受僱人仕(週薪£183或以上)
B)自僱人仕(一年盈利£6,475或以上)

三)大概要比幾多錢?點樣計?
National Insurance同Income Tax唔同,Income Tax嘅稅率係基於年薪而定;而NI交幾多係視乎你出糧果個period賺幾多錢而定:

-週薪介乎£183至£962為12%
-週薪£962以上為2%

四)幾時要比?幾耐比一次?
打工仔嘅話,你出糧條數就係先扣左NI同Income Tax嘅Gross Income。每一期payslip會顯示左你NI嘅contribution。自僱人仕

五)如果我自己做生意駛唔駛比?
NI主要係保障打工仔,作為老闆嘅你可以選擇自願性供款,或者請返自己當僱員咁交。

申請流程&時序https://www.gov.uk/apply-national-insurance-number
申請過程其實唔複雜,打個電話填下form再面試就搞掂。建議一落地就盡快處理,因為NI果封信如無意外會係你最先擁有嘅地址證明,方便你去開銀行戶口,搞車牌等等,而且有時面試要等幾個禮拜先有空缺。打之前請你確認你可以合法喺英國做野。

Step One:打電話
到埗英國後打去政府NI專線。

National Insurance number application line (England, Scotland and Wales)
Telephone: 0800 141 2075
Textphone: 0800 141 2438
Monday to Friday, 9am to 3pm
Find out about call charges (https://www.gov.uk/call-charges)

電話嘅工作人員會問你一啲簡單嘅問題(少聽英式口音嘅朋友係時侯可以J下!)。大致內容如下:

1. Why do you apply for NI number? (咁都要問?係咪當我地香港人on9?)
2. Are you living in UK now?
3. What is your visa type? (希望不久既將來我哋可以驕傲咁答:我係揸BNO合法過黎做野同生活既。)
4. Did you apply for NI number before? (我諗睇得呢篇既你都無掛?)
5. What’s your contact number?
6. What is your date of birth?
7. What is your nationality?(香港人!HONG KONG!)
8. Do you have any other nationality?(自由作答)
9. Are you single? 

個人資料問題(要小心讀清楚,英國人串英文字母既方法同我哋平時用開唔同,我哋有另一篇教學)
1. What is your surname?
2. What is your given name?
3.  What is your address & Postcode? (如果未咁快搵到屋既話,可以係你落腳點既地址,總之你收到信就得)

簽證問題(如果你唔係英藉而係揸visa黎英國)
1. Where is your visa issued?
2. When is the expiry date of your visa?
3. Where is your BRP issued? (而家未知BNO持有人駛唔駛申請BRP,但Tier5 working holiday既持有人入境係需要拎BRP。BRP係合法居留期內既屬於你既ID card,出入境都必須要出示)
4. When is the expiry date of your BRP?

Step Two:預約面試
電話工作人員會同你預約面試時間同地點,而且會講一組16位數字既Reference numbre(請抄低!),通常打完電話五個工作天至一個禮拜內政府會寄一封面試詳情既信比你。通常面試既地點都係你果區,大部分面試係Job Center舉行。


Step Three:面試
請確認你有帶備信內列明既文件(睇圖),基本上帶哂任何證明到你合法工作及留英既資料就無死。去到等嗌名再提供你既文件,工作人員會拎去影印,問你關於個人資料、簽證等問題同埋幫你填form。有咩唔清楚放心慢慢問慢慢答就ok,過程都好簡單易明,到最後係form度同埋BRP/ Passport影印本簽返名就ok喇。


工作人員會比一封通知信你,話你知大概等六至八個星期就可以收到NI Number,如果冇收到就打返電話講返信上既Reference Number跟進。工作人員提供比你既臨時證明文件可以比你未收到NI Number之前搵工用。僱主會接納呢份文件,受到NI Number後補返就ok。當年面試過程我大概用左半小時就搞掂!

Step Four:等收信視乎你到埗果段日子多唔多人申請,如無意外六至八個星期就會收到一封好簡單既信,入面有列明你獨一無二既NI Number。好好保存呢封信同埋抄低係安全既地方~你英國既生活就踏出左成功既第一步,恭喜你!

我哋陸逐會有更多文章幫香港人開始英倫新生活嘅post出嚟,如果唔明可以social media inbox或email我哋,好願意解答。