1）城市介紹Glasgow屬於Lanarkshire，正確黎講係South Lanarkshire。自開埠以來一直都係都係一個好大嘅港口城市，同曼城一樣係一個工業化嘅城市, 係英國排第三大或者第四大嘅城市一路以來Scotland都唔係一個移民國家，所以大部分人口係白人。小小歷史知識分享：Glasgow以前係一個奴隸交易嘅港口，有幾條街名仲係用緊以前奴隸主個名命名，二戰時期有好多意大利人避難走到左去Glasgow，所以唔難發現呢度有好多意大利餐廳， 係英國首先開始賣gelato既地方。同London一樣， Glasgow都分開東西邊，西邊係傳統富人區。格拉斯哥大學亦位於西邊，哈利波特都有喺嗰邊取過景, 貴價餐廳都會集中喺西邊。東邊有個大公園叫Alexandra Park。River Clyde貫穿了整個城市。Scotland出名咩呢?好多人都認為係羊毛呀風景呀!如果大家係Edinburgh買到嘅羊毛其實好多都係made in china，唔一定抵買。出名食嘅有傳統Haggis， 簡單黎講就係羊內臟做成嘅腸，其實個味道同black pudding都幾相似。仲有大家都好熟悉嘅蘇格蘭舞Ceilidh，係籌款結婚，周年節慶嘅必備節目。蘇格蘭有隻soft drink叫Irn-Bru，係Scottish 既國飲，我相信全世界都好小可有個地方係可口可樂唔係最賣得既汽水。當然呢邊嘅whiskey都好唔錯啦!
2）工作工作方面其實咩工種都有，但有心理準備人工會比愛丁堡低。做Marketing嘅朋友就唔係好建議去Glasgow啦，因為就算搵到工，人工都唔可觀，有朋友即使有2個degree，稅前都只得£1，800/月左右。工作機會亦唔多。雖然Glasgow前身係工業城市但到今時今日，Science， Bio tech ，space engineering，arms trade都幾多機會。做IT同Accountant 都會收入穩定，但人工一定唔及其他城市高，低生活開支低其實完全cover到。 要注意嘅係Scotland呢邊£25,159 to £43,430要俾21%稅，呢一樣野係英格蘭係無嘅。易唔易搵到工其實好見人見智。 JP morgan Scotland嘅總部就係位於Glasgow。 做finance嘅各位可以留意返。係lockdown之前job fair 都會不時舉行 ，公司會藉此招聘人才。如果對威士忌有番咁上下認識Glasgow將會係你發展所長嘅好地方。 近幾年Scotland 有一啲新興專搞local tour嘅公司，主要針地返亞洲市場客路。另外Glasgow有樣野特別就係無咩hostel唔似倫敦咁多。 但其實呢方面嘅需求都幾大，因為本地個展覽中心都成日好多活動/演唱會，又或者搞Airbnb都有so嘅。
3）租／買屋居住方面，其實同好多大城市一樣，市中心會比較繁華少少，住遠啲的話會無咁靚啦。一般係Glasgow嘅兩房單位大概係£900-£1300左右不等(新樓condition)。如果住舊少少嘅單位可以平到£500-£600成間屋。同埋近來愈來愈多人認為Glasgow係一個好嘅投資地點，所以好多人黎買樓，因此樓價已經升左少少，但相比香港係小毛見大毛，講緊嘅係£200K 左右已經可以買到層樓。 喺蘇格蘭買樓，通常嘅情況之下你都係要出高過個asking price少少，同英格蘭啱啱相反。業主要準備埋驗樓報告，唔係買家自己嘅責任。
4）飲食物價食方面，就見人見智，個人經驗黎講，一個人如果唔係成日出街食，每個月洗費£200其實都做得到，偶爾出街食就£3-400啦。確實係平過傳統大城市London同Manchester好多。
5）交通係Glasgow都有得搭地鐵，但唔係叫tube係叫subway同美國一樣。 Glasgow嘅subway係一條循環線，對於年紀大嘅朋友仔比較容易適應。另外Glasgow嘅人有一種興趣，就係買一張subway day pass，去subway沿線嘅每間酒吧幫襯瘋狂飲， 叫做subcrawl
6）區域介紹至於Glasgow有咩地區唔建議住呢，Maryhill係其中一個地方好多Glasgow人話要避免住。但我本身住過一排，發覺又冇乜野。另外Springburn，都有幾多中國移民係係個邊, 但Springburn/Braehead內都有D shopping mall係幾正嘅。Paisley， East Kilbride, Govan, Parkhead都係要遠離嘅區域。如果要選擇好區就會建議住番west end，East Dunbartonshire， Bearsden， Partick, Thortonhall， Hyndland， Anniesland， Park Quadrant 呢D區份，而且近Glasgow university，亦都係主要遊客區，治安好同適合居住。
英國獅子山 Lion Rock Hill UK 