英倫生活消費分析!(附個人識食識玩好建議)

倫敦生活預算

聽過好多香港朋友講覺得英國好貴,驚過嚟生活指數太高。
但其實呢,咁啱呢幾日Mercer report出咗最新「全世界最貴城市」統計,香港又排全世界第一!而倫敦只係排第十九。

英國消費指數對香港人嚟講都唔算差天共地。
今次我哋淺淡下英國生活各方面消費水平,等大家過嚟英國生活可以有個預算!

1)住-租金

作為國際大城市嘅倫敦,好多人都認為係倫敦住會好貴。無錯,某程度上都可以幾貴。

其中租金佔每個月嘅支出最多,睇番2019嘅條數,住宿基本上會佔左你收入一半咁濟。但當然好睇你住咩地區啦!


之前我哋分享嘅英倫搵屋攻略都有大概講過,其實倫敦只要唔介意住出少少,都可以用千鬆磅住得好大嘅地方。我哋身邊朋友嚟working holiday 4個女仔share一間zone2嘅house,每人大約550磅左右包所有bills。

相反,分享下我哋比較有錢嘅奧地利情侶朋友住倫敦Zone 1 東邊Shoreditch嘅情況,佢地租咗一間位於Shoreditch嘅1 bedroom靚 flat:

租金:£2,500/月

Council tax: £1344/年

以佔43.7%黎計,估計佢地每月after tax income至少有 £5,721(£2,500/43.7%),先夠應付!

所以想住Zone 1又要住靚屋嘅朋友仔就要好好考慮下啦!

不過因為疫病關係奧地利情侶將會搬番去奧地利,而且其實倫敦好多人都因為疫情回國,相信未來倫敦租金將會稍微回落。

2)食

自從英國3月尾lockdown開始,我地都極少出去食飯(都無餐廳開門LOL),基本上我地由早到晚都係自己屋企煮。所以可以分享下完全唔外出用膳嘅費用俾大家參考下。

主要消費嘅超級市場:Tesco & H mart (韓國超市)

平均每星期買一次餸, 一般每次消費約£80左右

以下為二人份量

早餐: 腿蛋通/ 牛油果芝士bagel/蛋治 加杯咖啡

午餐: 一餸一飯

晚餐: 兩餸一湯+甜品

P.S 如果你堅持要食 菜芯、白菜、通菜、豆苗、芥蘭呢類嘅菜就要有心理準備啦

因為以上嘅菜係英國一啲都唔平。實屬上等菜!一餐三人份量嘅通菜要大約4-5英磅

一包10KG日本珍珠米,價值£30.99(係,我哋係鐘意食日本米所以花費不少)

其他5KG 泰國米大約10英磅

利申:非Vegan或 Vegetarian


無飯主義者既話,呢邊d人勁鐘意去PRET買wrap丫三文治丫沙律做早餐/午餐,連咖啡嘅話大約6-7磅。倫敦office 區通常會有food market賣下burger、fish & chips、asian飯盒大約9磅左右。

出街食晚餐好睇你食咩,一般出SOHO食意大利/日本/英式野,人頭計average晚餐£25-£30左右,starters通常£6-£8,mains就大約£15-£18。但話事話倫敦食西餐真心高質,性價比又高,只需要£2x /per head就享受到香港價值$4xx質素嘅西餐。當然要貴都可以食到好貴啦!如果想請我食請快快DM我!


總括嚟講,如果肯自己煮野食,唔係餐餐大魚大肉嘅話大約£2-£3可以煮到一餐,同埋呢邊嘅grocery食物質素都好高,好多蔬果都好fresh,又有好多英國製造嘅有機產品。Haagen Dazs家庭裝特價果陣只係3磅!!!而且Muller牌yogurt特價果陣25p就有一杯~~好多正野架都!

倫敦衰在唔會好似香港咁有50蚊以下平靚正既大份野食,要食得飽(同埋要食熱野嘅話)起碼要8磅先搞掂。呢邊係唔會有30蚊一碗米線、幾蚊雞蛋撻同埋8蚊串魚蛋…:(

3)交通 - 公共交通

Tube

以前我星期一至五要由Zone2搭巴士+Tube到Zone1 返工,所以我會買weekly TFL pass £36.1或者monthly £138.7。以前香港月費黨鐵卡都只係四百幾,英國交通真心貴

如果唔想買pass,用Oyster/ Contactless Payment Card 搭車嘅話每日都會有個上限cap,而且大家記得用Oyster/ Contactless Payment Card搭Tube會比起用cash平一半@_@

大家可以去下面條link睇番唔同zone之間daily cap (按番大家嘅唔同需要)
如果大家主要市中心 Zone1-2 來回嘅話,每日cap大約7英磅左右。

https://tfl.gov.uk/fares/find-fares/tube-and-rail-fares/caps-and-travelcard-prices

Single journey就可以參考以下張圖


Bus

搭巴士只係£1.50…但唔會動搖到我日日揸車嘅決心!


交通-自駕

作為一個揸車J,會留意油價有無跌,早2個月因為疫情跌到落谷底,油價只係像徵式跌少少,我對眼反到一個點。但無辦法地我只好死死氣地去入油…以我架VW Golf TDI柴油車入滿一次油要大概£70,可以行到500miles (唔入City)左右,等於800KM。幾耐入一次就睇返你自己有幾常揸啦!相信有係香港揸車嘅朋友都好難接受,無錯呢個就係事實。

4)娛樂


如果以一般香港人鐘意禮拜六日都出街消費嘅活動嚟講:

市中心一張2D成人戲飛大約8-10英磅
飲咖啡Latte大約3磅
Museum 例如Tate Modern, Natural History Museum, V&A 等等都係free admission,特別展覽就通常12-18磅入場費


我哋住city outskirt而且鐘意大自然行山,好少出市中心行街食飯。如果我哋嘅娛樂消費主要係去

英國National Trust嘅景點(例如城堡,花園,大宅,行山路徑等,一年membership兩個成人任去係10英磅)同埋英國皇家園藝學會Royal Horticulture Society嘅花園(一年membership兩個成人任去 48.75英磅)



而且倫敦有好多公園同埋walks 可以行,例如夏天好多人跳入public pool 游水嘅Hampstead Heath公園,Regent’s Park,Greenwich Park,Hampton Court Palace等等,都係我哋會周末去嘅地方,行下草地,食下雪糕,睇下風景同埋望下花就一日。除此之外,倫敦有好多weekend market,例如Boardway Market咁樣,有好多小店賣咖啡、賣野食、書店、麵包店、飾件、vintage衫~比較出名大家都聽過嘅有Brick Lane Market(賣vintage衫/野食/等等),或者Peckham Indepedent Ceramic Market呢d手作市集都係免費入場。

Peckham Independent Ceramics Market


旅行方面,英國十分大,比如南邊有出名嘅海邊Cornwall 同Dorset,倫敦以上有英式田園小區Cotswolds/山區Peak District,中部有York,北部有湖區,再上可以直達Scotland。搭火車去一個weekend都係非常方便。而且London Kingscross 有EuroStar直達Paris/Belgium等地,有特價嘅時侯可以平到29英磅一張巴黎單程火車飛。



相信大家都知如果要去其他歐洲國家有Ryan Air, Easy Jet 等廉航,幾十英磅就可以去到意大利/西班牙等等。


總言之,豐儉由人(廢話)~不過英倫無大家想像中咁貴,只可以話最貴就係交通呢一part,同埋食野冇香港幾廿蚊嘅平民美食。希望可以幫到大家,如果對於嚟英國生活或者落腳有問題,歡迎搵我哋問清楚啊~

------------------

Lion Rock Hill UK 香港人來英落腳點

兩個90後香港人於英國lockdown期間開嘅平台,無中武肺。

希望盡小小力幫香港人,保留香港文化同精神。


-加入FB Group 英倫尋找屬於香港人嘅另一種生活 同聲同氣群組及活動

https://bit.ly/2MIggVk


-加入Telegram Group 加入來英香港人同聲同氣群組、日後活動公佈

https://t.me/joinchat/SvDuKxq1kEmVMjPK0dZ-tw

🍜Follow IG 每日update 英倫生活文化 資訊

https://www.instagram.com/lionrockhill.uk/


英倫生活消費分析!(附個人識食識玩好建議) 有 “ 3 則迴響 ”

  1. 多謝你分享,我似乎唔岩去英國,因為食同玩都大不同😢😢😢送個女去又唔捨得,自己去埋又諗唔掂⋯好痛苦😖我唔想個女係港共暴政中長大

    1. 英國好大,可以有好多種生活,第時多左香港人黎,都相信會有多d岩香港人既娛樂。再用d時間諗諗吧~或者問個女/家人想點。支持!

  2. 多謝你分享,我似乎唔岩去英國,因為食同玩都大不同😢😢😢送個女去又唔捨得,自己去埋又諗唔掂⋯好痛苦😖我唔想個女係港共暴政中長大

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s